PortalMadura.Com, Sumenep – Pemerintah Kabupaten Sumenep, Madura, Jawa Timur, menggelar upacara hari jadi ke 748, Selasa (31/10/2017). Pada upacara yang dipusatkan di Kantor Bupati, Jalan Dr Cipto itu semua aba-aba menggunakan bahasa Madura.
Selain itu, para undangan yang hadir juga menggunakan pakaian adat Madura. Hal ini menunjukkan bahwa Sumenep memiliki ciri khas tersendiri yang beda dengan daerah lain di Jawa Timur.
Sambutan Bupati Sumenep, A Busyro Karim juga menggunakan bahasa Madura. Berikut sambutan lengkap dalam bahasa Madura.
DHÂDHÂBUN BUPATI SONGENNEP
NALÈKA APÈL MANDIRÂ MARÈNGEDDI
ARÈ JADI KABUPATÈN SONGENNEP SÈ KAPÈNG 748
TOR ARÈ JADI PROPÈNSI JÂBÂ TÈMOR SE KAPÈNG 72
TANGGÂL 31 OKTOBER 2017 POKOL 08.00
ENGGUN È PAKARANGAN KANTOR BUPATI SONGENNEP
ASSALAMU'ALAIKUM WAROHMATULLAHI WABAROKATUH
KAATOR SÈ MOLJÂ BÂKKÈL BUPATI SONGENNEP
KAATOR SÈ MOLJÂ KATOA DPRD KABUPATÈN SONGENNEP
KAATOR SÈ MOLJÂ ANGGOTA FORUM PIMPINAN DAERAH KABUPATEN SONGENNEP
KAATOR DHÂ' TARÈTAN PLT SEKRETARIS DAÈRAH TOR PARA ASISTÈN SÈTDA,
PARA PEJABAT SIPIL, TNI SARENG POLRI,
KAATOR SE MOLJÂ TOR MOGÂ EMOLJÂ'ÂGI SARENG ALLAH, PARA ALÈM OLAMA', PANGROMAT PANATA-GÂMA, SARENG PÈNONGGUL MAGÂRSARÈ, PIMPINAN ORGANSASI KAMASYARAKATAN, INSAN PERS, TOR PARA RABU SÈ NGÈRÈNG UPACARA SÈ SAMÈ MOLJÂ.
Ngabidi pamator bâdân kaulâ ngonjuggâgi okara pamoji sareng pangrasa sokkor dhâ' ajunan-èpon Gustè Allah Robbul ‘alamien, atas ni'mat tor kabellasan-èpon, sèka'dhimma bâdân kaulâ sadâjâ bisa alampaa'agi tor araya‘agi sala sèttong momen bersejarah ènggipanèka parengeddân arè jadi sè kapèng 748 Kabupaten Songennep.
Bid asma-èpon Pamarènta Daerah Kabupaten Songennep bâdân kaulâ ngatorragi Selamat Arè Jadi sè kapèng 748 dhâ' sadâjâ magârsarè Songennep sè enggun neng è 27 kacamadân, 330 disa sareng 126 kapolowan. Sanaos jara'èpon sè mèsa bâdân kaulâ sareng magârsarè banget jâu, tapè gi' paggun mènangka dâddiya sana' karabât sè raket tor magarsarè neng è Kabupatèn Songennep.
Jugân bâdân kaulâ ngatorragi apresiasi tor mator sakalangkong dhâ' sadâjâna magârsarè sè nyèngcèng tanang' gu'-teggu' sabbu' masuksès cita-cita pambângonan neng è Songennep, saè para Aparatur Sipil Nagârâ, Dunia Usaha, Pimpinan Organisasi Kamasyarakatan, Pimpinan Perguruan Tinggi, para Kalèbun, Kalangan LSM, Mahasiswa, Insan Pers sareng sadâjâ magârsarè sè magâmpang tor malodhâng dhâ' jâlân-jâlân kamajuan neng è Songennep.
PARA RABU SÈ SAMÈ MOLJÂ
Saat samangkèn Songennep ampon aomor 748 taon, nepteppagi tanggal 31 Oktober mènangka Arè Jadi Kabupaten Songennep kasambung sareng meddâllâ Serrat Kakancèngan dhâri salèrana Prabu Kartanagârâ Karajâân Singasari è taon 1269, sè ka'dhimma Demung Nayapati Arya Banyak Widè ètèbâ'âgi mènangka Adipati Songennep sè kapèng sapèsan kalaban asma Arya Adikara Wiraraja.
Sè marènta Songennep saabiddâ 23 taon Arya Wiraraja ampon bânnya' adinggâllâgi bârisan sejarah sè bânget argâ apèguna tor ampon nyabâ' dhâsar-dhâsar pambângunan kabupatèn Songennep sè ampon bisa èrassaagi kantos samangkèn.
Arya Wiraraja sè kalonta aropaagi pamimpin sè ahli dhâlem tarèka pamarèntaan, kantos kaanggep ahli strategi pènonjul è dhâlemmanna sejarah karâjâan è Nusantara. Mènangka strategi-èpon kantos mampo ngosèr tor makabun tantara Tartar natkala nompo perrang ka tana Jâbâ, sè ka'dhimma dhâlem kaddâdiyân kasebbut kantos anddâdiyâgi bâdhâna Karajaan Majâpaèt tor kantos penonjul tor andâddiyâgi lahirra nagârâ Nusantara.
Arya Wiraraja mènangka parbirâ otama sè ponjul è dhâlemmanna ngadeggâ nagârâ Agung Majâpaèt, sè aropa'agi satrèya pènonjul tor kaagungan panggâlian sè samporna. Pamanggina cokop lowas, saènggâna bân-sabbân tèndâk pamèkkèranna ta' tao lèngsèr dhâri kanyataan sè èlampaagi. Salèrana malabu sampa, sè ka'dhimma andâddiyagi motivasi dhâ' ka para magârsarè panerros saat samangkèn panèka.
Momentum Arè Jadi saat samangkèn, tadhâ' laèn dâddiya refleksi tor kaca kebbâng dhâ' generasi terrosanna, tor andâddiyâgi toladhân, jâ' para pamimpin Kabupaten Songennep molaè gi' dhimèn ampon abârissagi samangat abângon sè bânget lowar biasa, bâbârisan-èpon gi' bisa èrassaagi kantos samangkèn. Sejarah aropa'agi lalampon kona, namong lalampan ka'dhinto kodu èlampaagi jugân è bâkto samangkèn, sè ka'dhimma aropaagi motivasi tor nombuwâgi prestasi sè padhâ molaè gi' dimèn jugân dhâ' bakto sè bakâl dhâteng.
PARA RABU SÈ SAMÈ PARJUGÂ
Tantangan palèng berra' è Songennep saat samangkèn ènggi panèka majâgâ / maodhi' optimisme magârsarè Songennep. Saèstona Songennep ampon tadinggâl saponapa tèndâk manabi èbândingngagi sareng daèrah laèn neng è Jâbâ Tèmor. Mènangka pangobbâr kamajuan Songennep sè bakâl dhateng, palèng sakonè' bâdhâ tello hal sè otama, ènggi panèka HARMONISASI SOSIAL, DINAMISASI KULTURAL sareng INOVASI STRUKTURAL.
HARMONISASI SOSIAL ènggi panèka aropaagi komitment sadâjâ magârsarè kaangguy ajâgâ karokonan sareng samangat gutong rojung.
DINAMISASI SOSIAL ènggi panèka aropaagi kadiponapa bâdân kaulâ sareng para magârsarè mampo andâddiyâgi bâbârisan sejarah sè gi' dimen bisa bâdhâ'â argâ tor guna è saat samangkèn bân sè bâkal dhâteng. Bârisan sè kona ènggâpanèka ja' pèra' padâddi rancangan otabâ tolèsan kamajuan jâman dimèn.
Dinèng INOVASI STRUKTURAL èlampa'agi tor ègerra‘agi dhâri kamampowan lembaga-lembaga formal sareng informal è Songennep kaangguy nyèpta'agi rowang-rowang sè mampo nojju dhâ' kamajuwân.
PARA RABU SÈ SAMÈ MOLJÂ.
Saat samangkèn èkoca'agi èra kompetisi. Sabbân-sabbân daèrah alomba-lomba kaangguy anèngkattagi inovasi daèrana bâng-sèbâng nyoprè ta' kadinggâlân tèndak. Saka'dhinto jugân Kabupatèn Songennep terros alampaagi èkhtèyar sareng perubahan è sadâjâ bidang,
Sala sèttong capaian kaberhasilan palèng rajâ Pamarènta Songennep saat samangkèn ènggi panèka ampon alampaagi (a-oprasina) Bandara Trunojoyo Songennep aropaagi Bandara Komersial sè aladinè Rute Songennep – Sorbâjâ èntar molè (mèyos rabu) sabbân arè.
Kalabân aksès sè magâmpang panèka, Songennep bâkal atambâ èyabâs è kancah Nasional. Bâkal atambâ bânnya' orèng lowar Songennep sè angrabuwi otabâ dhâteng dhâ' Songennep. Ponapa polè taon dhâteng bâkal bâdhâ'â Visit Sumenep 2018 sè bâkal agellâr èvent règional, nasional jugân langkong-langkong Internasional.
Rarenggân otaba program ka'dhinto apangareb ngajâk otabâ ngonjâng para Wisatawan Nusantara tor Mancanâgârâ nyoprè rabu dhâ' Songennep. Pramèla dhâri ka'dhinto, pola pikir magârsarè Songennep kodu tabukka' kalabân perubahan.
È dhâlemmanna masukses program panèka, Pamarènta Kabupatèn Songennep bâkal terros anèngkattagiyâ sarana sareng prasarana, sè kodu èdhukung sareng kamampowan birokrasi sè pènonjul, sè ceppet tor parèkas, sè ka' dhimma dukungan dâari pihak swasta sareng magârsarè sè krèyatif tor produktif, ka'dhinto jugân banget èyarep
PARA RABU SÈ SAMÈ MOLJÂ
Ngèrèng sadâjâ wajib nyokkorè amargâ èkhtèyar sareng parjuangan sè mamaju Songennep ampon bâdhâ asèlla. Adhâsarragi data dhâri Badan Pusat Statistik, indeks Pambangunan Manusia Kabupaten Songennep ampon manèngkat dhâri 62,38 poin è taon 2015 samangkèn ampon dâddi 63,42 poin è taon 2016.
Angka kamèskènan toron dhâri 20,2 persèn dâddi 20,09 persèn. è dhâlerm sataon ampon mampo matoron jumlana orèng mèskèn dhari 216 èbu 840 orèng dâddi 216 èbu 140 orèng.
Angka harapan sakolah jugân ampon manèngkat dhâri 12,41 taon kantos 12,73 taon. Dinèng angka Harapan Hidup jugân manèngkat dhâri 70,42 taon kantos 70,56 taon.
È taon samangkèn, Kabupatèn Songennep jugân ampon mampo mempertahankan Penghargaan Adipura sè kapèng sanga' otabâ sè kapèng ennem èdhâlemmanna koron bakto pèttong taon bingkèngan. Mala è dhâlemmanna dhu taon bingkèngan namong Songennep mènangka tong-sètongnga Kabupatèn neng è polo Madura sè kèngèng Penghargaan Adipura.
Pramèla dhâri ka'dhinto, sakalèyan aggi' ngèrèng pandeng masa depan Songennep sè atambâ nyonar. Kolaborasi sè dinamis sadâjâ kaagungan peran sareng profèsi sèbânget èyareb. Tadhâ' kasuksesan sè ta' abâlângajâ. Tor tadhâ' kaberhasilan sè ta' alako areng-sareng, jugân tadhâ' kagampanagn kalabân ta' èsarengngè adu'a.
PARA RABU SÈ SAMÈ MOLJÂ.
Saka'dhinto bisaos sè bisa èatorragi è dhâlem kasempadân sè nyampornaagi panèka, Dirgahayu Songenep Kabupatènna kaula sareng panjenengngan sadâjâ, Songgennep kaagunganna kaula sareng panjenengngan sadâjâ, Songennep tanggung jawâbbâ torè karobut areng-sareng.
Pamator pongkasan, ngèrèng bâdân kaulâ sareng panjenengngan sadâjâ jâ' bâ-cokbâ nyo'on lèlla, pètodu, kakoadân, tor kalodhângan dhâri ALLAH Sè Maha Asè. Nyoprèya binareng tor abâlangajâ edhâlem alampa'agi pambângonan, kantos andâddiyâgi Songennep, Somekkar, sè mekko so'è mekkar, tor bisa'a kalampan kalabân saè samporna tor teptebbâ kèngènga raraksan dari Allah sè Maha Pangraksa.
SALAMET ARÉ JADI PROVINSI JAWA TIMUR SÉ KAPÉNG 72
SALAMET SUMPAH PEMUDA
MATOR SAKALANGKONG.
WASSALAMU'ALAIKUM WARAHMATULLAHI WABAROKATUH
Songennep, 31 Oktober 2017
Bupati Songennep
DR. ABUYA BUSRO KARIM, M.Si
DAPATKAN UPDATE BERITA LAINNYA DI
